1 Timothy 2v1-8

¹In die eerste plek vermaan ek dan dat smekinge, gebede, voorbedes, danksegginge gedoen moet word vir alle mense;  ²vir konings en almal wat hooggeplaas is, sodat ons 'n rustige en stil lewe kan lei in alle godsvrug en waardigheid.  ³Want dit is goed en aangenaam voor God, ons Verlosser,  ⁴wat wil hê dat alle mense gered word en tot kennis van die waarheid kom.  ⁵Want daar is een God en een Middelaar tussen God en die mense, die mens Christus Jesus,  ⁶wat Homself gegee het as 'n losprys vir almal, as die getuienis op die regte tyd,  ⁷waartoe ek aangestel is as 'n prediker en apostel — ek sê die waarheid in Christus, ek lieg nie — 'n leraar van die heidene in geloof en waarheid.  ⁸Ek wil dan hê dat die manne op elke plek moet bid en heilige hande ophef sonder toorn en twis.